पुणे : पोलिसांच्या गुन्हे शाखा युनिट ५ ने मोठी कारवाई करत मोक्का गुन्ह्यात मागील एका वर्षापासून फरार असलेल्या आरोपीला आणि त्याला आसरा देणाऱ्या तरुणाला जेरबंद केले आहे. ही कारवाई बारामती तालुक्यातील वाघळवाडी येथील कळंबवस्ती येथे करण्यात आली.
रोहित भारत गायकवाड (वय २५, रा. गोसावी वस्ती, हडपसर, पुणे) असे मोक्का गुन्ह्यात फरार असलेल्या मुख्य आरोपीचे नाव आहे. तर त्याला आसरा दिल्याप्रकरणी ऋतिक ऊर्फ काल्या रणजित रावळकर (वय २६, रा. कळंबवस्ती, वाघळवाडी, ता. बारामती, जि. पुणे) याला देखील अटक करण्यात आली आहे.
वानवडी पोलीस स्टेशनमध्ये दाखल असलेल्या गुन्ह्यात आणि मोक्का (महाराष्ट्र संघटित गुन्हेगारी नियंत्रण अधिनियम) अंतर्गत रोहित गायकवाड हा सुमारे एका वर्षापासून पोलिसांना हवा होता. तो वाघळवाडी येथील कळंबवस्ती येथे ऋतिक रावळकर याच्याकडे लपून बसल्याची गोपनीय माहिती गुन्हे शाखा युनिट ५ च्या पथकाला मिळाली होती.
या माहितीच्या आधारे पोलिसांनी वाघळवाडी येथे जाऊन शोध घेतला असता तो तिथे मिळून आला. रोहित हा गंभीर गुन्ह्यातील पाहिजे असलेला आरोपी असल्याचे माहीत असूनही ऋतिकने त्याला आसरा दिल्याचे निष्पन्न झाल्याने पोलिसांनी दोघांनाही ताब्यात घेतले. पुढील कारवाईसाठी त्यांना वानवडी पोलीस स्टेशनच्या ताब्यात देण्यात आले आहे.
सदरची कामगिरी मा. अपर पोलीस आयुक्त, गुन्हे श्रीमती तेजस्वी सातपुते, मा. पोलीस उपायुक्त, गुन्हे श्री. गौरव हासन, मा. सहाय्यक पोलीस आयुक्त, गुन्हे २, श्री. राजेंद्र मुळीक यांच्या मार्गदर्शनाखाली गुन्हे शाखा युनिट ५ कडील पोलीस निरीक्षक श्री. संदीपान पवार, पोलीस निरीक्षक श्री. शाहीद पठाण यांच्या सूचनांप्रमाणे पोलीस उपनिरीक्षक अभिजीत पवार, पोलीस अंमलदार राहुल ढमढेरे, अविनाश इंगळे, शहाजी काळे, अमर चव्हाण, परमेश्वर कदम, शशिकांत नाळे, विनोद शिंगाडे, प्रताप गायकवाड, अकबर शेख, सुधीर सोनवणे, स्वाती तुपे, जयदेव भोसले, नेत्रिका अहरसुख, नासेर देशमुख आणि महिला पोलीस अंमलदार मयुरी पालवे यांच्या पथकाने केली आहे.
बातमी बद्दल आपला अभिप्राय नोंदवा
बातमी शेअर करण्यासाठी येथे क्लिक करा
